10:48
166

"Baku Steel Company” dən yenilik - dünyada ilk dəfə Azərbaycanda gerçəkləşəcək -

Yeniliyin mahiyyəti metal əritmə prosesində elektrik qövs sobasında süni intellektdən istifadə edilməsindən ibarətdir. Hazırda ərinti zamanı 60 tonluq sobaya şixtə verilməsi üçün metalın sıxlığından asılı olaraq 3-4 badya yüklənir. Badyaların sobaya verilməsini və metalın əridilməsi prosesini isə poladəridənlər nəzarətdə saxlayırlar. Lakin badyaların boşaldılması və ərinti getdiyi zaman müxtəlif səbəblərdən hər dəfə 1-2 dəqiqəlik gecikmə baş verir. Gecikmə həm iş prosesində elektrik enerjisinin israf olunması, həm də həmin müddətdə istehsal həyata keçmədiyindən məhsul itkisi deməkdir.

Yeni layihənin tətbiqi ilə isə metalın əridilməsində qərarvermə prosesi insan tərəfindən deyil, süni intellekt vasitəsilə həyata keçiriləcək. Həm ərintinin getməsi, həm qatqıların əlavə edilməsi, həm də digər lazım olan proseslər üçün lazımi parametrlər və məlumatlar kompüterin yaddaşına daxil ediləcək və proses avtomatik rejimdə tənzimlənəcək. Yəni insan faktoru minimuma endiriləcək və poladəridənlər sadəcə işin gedişatına nəzarət edəcəklər. Hər hansı gecikmə olduğu təqdirdə sistem dərhal xəbərdarlıq edəcək və lazımi tədbirlər görüləcək. İlkin hesablamalara görə, bu startap tətbiq olunarsa, sutkada 24 saat işləyən zavod il ərzində milyonlarla manat vəsaitə qənaət etməklə gəlirlərini daha da artıracaq.
 
Layihənin proqramlaşdırma işini "Baku Steel Company” MMC-nin sifarişi və texniki tapşırıqları əsasında Azərbaycan Dövlət Neft və Sənaye Universiteti (ADNSU) həyata keçirəcək. Bununla bağlı artıq "Baku Steel Company” MMC-nin Baş direktoru Kamal İbrahimov və ADNSU-nun rektoru Mustafa Babanlı arasında keçirilən görüşdə razılıq əldə edilib. Proqramlaşdırma işlərinə qeyri-səlis məntiq nəzəriyyəsinin banisi olan Lütfi Zadə irsinin davamçısı, dünya şöhrətli azərbaycanlı alim, ADNSU-nun professoru Rafiq Əliyev, texniki tərəfdən isə işlərin gedişinə BSC-nin Baş direktorunun istehsalat üzrə 1-ci müavini Ramin Kərimov rəhbərlik edəcəklər.
 
Birgə layihənin bir il ərzində tamamlanması nəzərdə tutulur.  Artıq layihəyə maraq göstərən xarici şirkətlər də var.
Xartırladaq ki, 2001-ci ildə fəaliyyətə başlayan "Baku Steel Company” MMC Cənubi Qafqazın ən böyük özəl metallurgiya şirkətidir. BSC hazırda bir ədəd 60 tonluq və bir ədəd 30 tonluq elektrik qövs sobasından ibarət 2 əritmə sexinə, 3 çeşidli yayma xəttinə, bir ədəd tikişsiz boru istehsal edən yayma xəttinə, bir ədəd spiralvari tikişli boru istehsal edən yayma xəttinə, bir ədəd fasonlu tökmə istehsal edən mini zavoda və bir oksigen zavoduna sahibdir.

BÖLMƏNİN DİGƏR XƏBƏRLƏRİ